|
2009 2010eko denboraldian aurkezten ditugun erakusketak eta katalogoak itsasoan hil ziren gure marinelen oroigarri izan nahi dute. Aspaldiko garai haietan, asko eta asko ziren (plentziarrak zein gure herriarekin loturaren bat zutenak) naufragioetan itota hil zirenak, eta hori, gainera, nazio guztietako hainbat itsasontziri gertatzen zitzaien. Zeharkaldiak arriskuz beteta zeuden. Izan ere, kapitainen trebetasuna handia izanda ere, urakan, ekaitz, korronte, laino, gerra‑ekintza eta horrelakoei begira egon behar zen denbora guztian.
Gure lan honetan, 1900etik gaur arteko epea hartu dugu, eta, hurrenkera kronologikoan jarrita, erakusketak 14 auzokoren historia kontatzen du, bai eta itsasontziarena eta heriotza ekarri zien istripuarena ere. Historia horietako bat Principe de Asturias baporearena da (garai hartan Titanic esaten zioten): 1916an, zoritxarreko amaiera izan zuen Punta Boi inguruan (Brasil), eta bertan 425 pertsona hil eta 143 bizirik atera ziren. Itsasontziko kapitain José Patricio Lotina Abrisketa eta bertako makineriako buru Dionisio Oņate Torrontegi, biak plentziarrak, hil egin ziren. Edo Banderas baporearen historia: 1940an, Galiziako kostatik hurbil nabigatzen ari zela, U-53 urpekuntzi alemaniarrak torpedoa jaurti eta hondoratu egin zuen. Itsasontziko kapitain plentziar José Antonio de Madariaga y Zabala hil egin zen, beste 22 tripulatzailerekin batera. Ez dugu erakusketa osoa deskribatu nahi, eta horregatik, bada, gonbita luzatzen dizuegu ezagutzera etor zaitezten.
Azkenik, jakin ezazue handitu egin dugula Museoaren erakusketa iraunkorra: herriko margolari Jenaro Urrutiaren koadro bat gure artean dago. Bestalde, berriro argitaratu dugu Belatik Baporera pinturaren bidez katalogoa, eta nahi duenak eskuragarri du 2010eko egutegia. |
